2026 жылғы 15 мамыр күні М.Өтемісов атындағы Батыс Қазақстан университетінде «Ашық есік айлығы» аясында «Мансап күні – 2026» атты бос жұмыс орындары жәрмеңкесі ұйымдастырылды. Ауқымды шараның басты мақсаты – бітіруші түлектердің жұмысқа орналасуына қолдау көрсету, жұмыс берушілермен тікелей байланыс орнату және жас мамандардың еңбек нарығына бейімделуіне мүмкіндік жасау. Жәрмеңкеге университеттің 6 факультетінен 60 білім беру бағдарламасы бойынша бітіруші түлектер қатысты. Студенттер өз мамандықтары бойынша бос жұмыс орындарымен танысып, жұмыс берушілермен тікелей сұхбаттасып, түйіндемелерін тапсыруға мүмкіндік алды. Шара барысында М.Өтемісов атындағы БҚУ академиялық мәселелер бойынша Басқарма мүшесі, проректор Кайсагалиева Гульжахан Смаиловна, Батыс Қазақстан облысы әкімдігі жұмыспен қамтуды үйлестіру және әлеуметтік бағдарламалар басқармасының «Еңбек мобильділігі орталығы» директорының орынбасары Айнур Мұхамбетқалиқызы Қазмұханова, сондай-ақ түлектерге сәттілік тілеген университет түлегі, Түлектер қауымдастығының мүшесі, «IT GROUP KAZAKHSTAN» ЖШС бас директоры Дудниченков Михаил Михайлович және Орал қалалық білім беру бөлімінің әдіскері Бигалиева Антонина Александровна сөз сөйледі. «Мансап күні – 2026» аясында 70-тен астам мекеме мен ұйым өкілдері қатысты. Қатысушылар студенттерге бос жұмыс орындары, тағылымдама мүмкіндіктері және еңбек нарығындағы талаптар туралы ақпарат беріп, түлектермен тікелей сұхбат жүргізді. Шара барысында студенттер мен жұмыс берушілер арасында ашық сұхбат алаңы ұйымдастырылып, бітіруші түлектер өздерін қызықтырған мамандықтар бойынша түйіндемелерін тапсырып, кәсіби кеңес алды. «Мансап күні – 2026» түлектердің кәсіби дамуына серпін беріп, университет пен жұмыс берушілер арасындағы байланысты нығайтқан маңызды іс-шара болды.

2026 жылдың 13 мамырында М. Өтемісов атындағы Батыс Қазақстан университетінде «Ашық есік айлығы» шеңберінде Ақжайық ауданының жұмыспен қамту орталығы мен бірқатар мектеп өкілдерінің педагогикалық білім беру бағдарламаларының бітірушілерімен кездесуі ұйымдастырылды. Іс-шарада жұмыс берушілер аудан мектептеріндегі қолжетімді бос лауазымдар, жас мамандарды қолдауға бағытталған бағдарламалар мен жұмысқа орналасу мүмкіндіктері жөнінде кеңінен ақпарат ұсынды. Түлектер жұмыс берушілермен тікелей пікір алмасып, өз түйіндемелерін тапсырып, мамандыққа қатысты сұрақтарына толық жауап алды. Кездесу еркін форматта өтіп, жас педагогтар үшін кәсіби тәжірибе алмасуға және еңбек нарығы туралы нақты түсінік қалыптастыруға тиімді алаң болды.

22 сәуір 2026 жылы М.Өтемісов атындағы Батыс Қазақстан университетінде «Жасанды интеллект дәуіріндегі түлектердің кәсіби трансформациясы және еңбек нарығына бейімделуі» тақырыбында форум өтті. Форум аясында жасанды интеллект жағдайындағы еңбек нарығының жаңа талаптары, түлектердің кәсіби бейімделуі, жұмыспен қамту тетіктері және цифрлық трансформация мәселелері кеңінен талқыланды. Қатысушылар өзара тәжірибе алмасып, білім беру ұйымдары мен жұмыс берушілер арасындағы ынтымақтастықты нығайту бағыттарын қарастырды. Іс-шараға мемлекеттік органдар, білім беру ұйымдары, жұмыс берушілер және әлеуметтік серіктестерден 30-ға жуық мекеме қатысты.

2026 жылдың 5 мамырында М. Өтемісов атындағы Батыс Қазақстан университетінде «Ашық есік айлығы» аясында Бәйтерек ауданының жұмыспен қамту орталығы мен аудан мектептерінің өкілдері педагогикалық білім беру бағдарламаларының түлектерімен кездесу өткізді. Іс-шара барысында жұмыс берушілер аудан мектептеріндегі бос жұмыс орындары, жас мамандарға арналған қолдау шаралары және жұмысқа орналасу мүмкіндіктері туралы ақпарат берді. Түлектер жұмыс берушілермен тікелей сұхбаттасып, түйіндемелерін ұсынып, өздерін қызықтырған сұрақтарына жауап алды. Кездесу ашық әрі еркін форматта өтіп, болашақ педагог мамандар үшін тиімді кәсіби алаңға айналды.

01.04.2026 ж. М.Өтемісов атындағы Батыс Қазақстан университетінде «Қазаэронавигация» РМК Орал филиалының өкілдерімен кездесу өтті. Іс-шараға әртүрлі білім беру бағдарламаларының студенттері қатысып, мекеменің қызметі, негізгі бағыттары және мамандарға қойылатын талаптар туралы толық ақпарат алды. Кездесу барысында өкілдер әуе навигациясы саласының ерекшеліктері, кәсіби даму мүмкіндіктері мен жұмысқа орналасу жолдары жөнінде кеңінен түсіндірді. Сонымен қатар, студенттер өндірістік тәжірибеден өту, тағылымдама мүмкіндіктері және болашақта жұмысқа орналасу шарттары туралы мәліметтер алды. Іс-шара соңында студенттер өздерін қызықтырған сұрақтарын қойып, мамандардан нақты жауаптар алды. Кездесу өзара ашық диалог форматында өтіп, студенттердің кәсіби бағыт-бағдарын айқындауға ықпал етті.

2026 жылғы 26 ақпанда университетімізде Ақпараттық жүйелер, Есептеу техникасы және бағдарламалық қамтамасыз ету білім беру бағдарламаларының бітіруші студенттерімен кездесу өтті. Іс-шараға Karachaganak Petroleum Operating B.V. (KPO) компаниясының өкілдері және түлектер қауымдастығының мүшелері қатысты. Кездесу барысында KPO компаниясының бизнес-қосымшалар секторының бастығы, университетіміздің 2007 жылғы түлегі Мұхамбетқалиев Серік Вахитович студенттерге халықаралық компаниядағы жұмыс мүмкіндіктері, мансаптық даму бағыттары және жастар практикасына қабылдау тәртібі туралы түсіндірді. Жастар практикасы бағдарламасы түлектерге өз мамандығы бойынша алғашқы жұмыс тәжірибесін жинақтауға, кәсіби дағдыларын дамытуға және тәжірибелі мамандардан тәлім алуға мүмкіндік береді. Кездесу барысында студенттер өздерін қызықтырған сұрақтарын қойып, еңбек нарығындағы талаптар мен ІТ саласының қазіргі даму үрдістері туралы пайдалы ақпарат алды. Іс-шара студенттер мен жұмыс берушілер арасындағы байланысты нығайтып, жас мамандардың кәсіби қалыптасуына оң әсерін тигізді.

2026 жылғы 24 ақпанда М.Өтемісов атындағы Батыс Қазақстан университеті филология факультетінде жұмыс берушілер және түлектер қауымдастығы өкілдерінің қатысуымен дөңгелек үстел өтті. Кездесуге №40 ЖББОМ, «Зейін» университеттік мектебі, №28 мектеп-лицейі, Д.Қонаев атындағы №44 мектеп-гимназиясы, №9 ЖББОМ, М.Б. Ықсанов атындағы №36 ЖББОМ директорлары, Жұбан Молдағалиев атындағы орталық әмбебап ғылыми кітапханасы, Хамза Есенжанов атындағы Батыс Қазақстан облыстық балалар және жасөспірімдер кітапханасы басшылары, сондай-ақ Жайық Пресс медиахолдингі өкілдері қатысты. Түлектер қауымдастығы атынан «Зейін» университеттік мектебінің директоры, университет түлегі Максимов Дәулет Серғалиұлы қатысып, білім беру бағдарламаларын жетілдіру бойынша ұсыныстарын білдірді.

2026 жылғы 20 ақпанда жаратылыстану-география факультетінде «Білім беру бағдарламалары мен кәсіби құзыреттіліктерді қалыптастырудағы мүдделі тараптардың рөлі» тақырыбында түлектер қауымдастығы, жұмыс берушілер және сарапшылардың қатысуымен академиялық комитеттің кеңейтілген отырысы дөңгелек үстел форматында өтті. Кездесуге қала мектептерінің директорлары, практик-мамандар, ғылыми және өндірістік ұйым өкілдері, сондай-ақ түлектер қауымдастығы мүшелері қатысты. Факультет деканы А.А. Тургумбаев оқу орнының қазіргі даму бағыты мен болашақ жоспарларын таныстырды. Сонымен қатар стратегиялық және цифрландыру департаменті директоры Э.Ж. Имашев еңбек нарығындағы сұранысқа ие мамандықтар мен құзыреттер картасы бойынша ақпарат берді. Білім беру бағдарламаларының жетекшілері мамандар даярлау бағыттарының өзекті мәселелері мен даму перспективаларын баяндады. Жұмыс берушілер мен түлектер тарапынан цифрлық құзыреттерді (Python, 1C, AutoCAD, BIM) меңгеру, кәсіби ағылшын тілін дамыту, командада жұмыс істеу дағдыларын күшейту, сондай-ақ өндірістік практиканы арттыру және дуалды оқытуды жетілдіру қажеттілігі атап өтілді. Кездесу барысында сауалнама арқылы жұмыс берушілердің нақты талаптары анықталып, қатысушылар арасында еркін пікір алмасу және networking форматындағы бейресми байланыс жүзеге асты. Жиын «өзгерістерге бейім, бәсекеге қабілетті маман даярлау» қажеттігі туралы ортақ тұжырыммен аяқталды.